私の旅行日誌~

Day 149

2月16  星期日

今天的行程~
冇出去……

琴晚研究咗好耐去邊, 今日天氣好好, 我都好想搵個地方去下, 但我又諗唔到去邊好, 我又好懶郁, 搞搞下都已經兩點啦, 都係唔出去, 留低睇下書好~
睇咗FB shared嘅東京Disney 311地震應變對策(https://www.youtube.com/watch?v=2ZU2r68Q6WU)~ 我真係覺得好感動呀, 呢啲事根本唔會發生喺香港同大陸, 日本始終係日本~ 我覺得香港Disney唔會拎啲Duffy俾人保護個頭~
今日天氣真係太好啦, 唔出去真係有もったいない嘅感覺~ 好好陽光, 個天仲好藍(但外面好大風下)~ 今日好奇怪, 佢哋都冇出嚟睇電視, 間屋静咗好多, 太好啦~
唔食嘢, 其實係一種self-negation, 當開心時我先會覺得肚餓, 唉, 所以我嚟咗讀書之後就好似唔係好食嘢啦…… 其實我真係唔介意自己煮自己食, 我真係覺得要估人點諗煮嘢有冇預我真係好煩!! 不過Patience又喺廚房煮嘢, 我又好難煮嘢! 其實自己煮都OK嘅, 咁我先會食菜(佢哋好少食菜)~
原來我又好幾日冇睇「來自星星的你」~ 全智賢真係做得好好, 超好笑~!! 套劇啲歌超好聽~ 一次過睇咗幾集~
我又開始諗整蛋糕啦~ 今次研究焗海綿蛋糕, 不過最擔心食八寸咁大唔知幾時先食得晒~ 不過唔緊要啦, 可以當早餐or下午茶食~ 只要我識用個焗爐就可以焗好多嘢啦~ 最快聽日可以試(不過冇焗爐紙………..)~
講開聽日, 聽日係好重要嘅一日, 首先要去睇牙醫~ 其實我唔怕睇牙醫, 只係怕要同啲人溝通, 同埋怕一次整唔晒要再睇, 希望唔會啦~ 其次聽日出essay個分~ 其實我真係覺得好奇怪點解係會出一個分數而唔係一個grade, 究竟個分數係點俾㗎呢?? 呢個唔係啱定錯嘅問題喎~ 老實說由中學以來我都未見過essay係俾分唔係俾grade~ 都唔可以話我唔緊張, 如果可以好似HKU咁選擇唔拎份essay唔知個分就好啦~ 如何個分好嘅話就焗個蛋糕慶祝下, 唔好嘅話都焗個蛋糕安慰下~
我睇晒17集「來自星星的你」啦~ 我反而覺得金秀賢喊嘅時候係最靚仔~
如冇意外, 星期二我就會同Naj食Ladurée啦, 好嘢~ 希望我咁期待唔會令我失望啦~

(P.S. 哈哈, 其實已經係九年幾之前嘅留學日誌啦, 還有人在看嗎??)